யந்திரங்கள் எவ்வாறு செயல்படுகின்றன..?

நமது பாரம்பரிய முறைப்படி உருவாக்கப்படும் எந்திரம் என்பது சப்த ரூபமான மந்திரத்தின் தோற்ற வடிவமாக குறிப்பிடப்படுகிறது. யந்திரங்கள் தெய்வீக அலை அதிர்வுகள் மூலம் மந்திர சக்தியால் அதற்குரிய பலன்களை அளிக்கின்றன. அந்த வகையில் ஒருவருக்கு உரிய குறிப்பிட்ட யந்திரத்தை அவர் பெற்று, அதற்குரிய மந்திரத்தை முழு நம்பிக்கையுடன் உச்சாடனம் செய்து வரும் போது தெய்வீக சக்திகள் அவரை சூழ்ந்து நின்று பாதுகாத்து, அவருக்கு வேண்டிய உதவிகளை அளிக்கின்றன.

யந்திரங்கள் ஒருவருடைய மன ஒருமையை அதிகப்படுத்துவதுடன், மன உறுதியையும் உருவாக்கி அவருடைய பிரார்த்தனைகள் மூலம் இறை சக்தியை பெறுவதற்கு சரியான  வழியை காட்டுகிறது. ஒரு யந்திரத்தின் சக்தி என்பது இந்த பிரபஞ்சம் வெளிப்படுத்தும்  சூட்சும அலை அதிர்வுகளை தன் சுற்றுப்புறத்தில் வெளிப்படுத்தி நேர்மறை சக்திகளை உருவாக்குவதாகும்.

ஒவ்வொரு யந்திரத்திற்கும் குறிப்பிட்ட ஒரு தேவதையின் அம்சம் உள்ளது. அந்த சக்தி மிக்க தேவதையின் ஆற்றல்கள் அந்த எந்திரத்தின் மூலம் அதற்குரிய பிரத்தியேக மந்திரத்தை ஜபம் செய்யும் பொழுது வெளிப்படுகிறது. அதனால் ஒரு யந்திரத்திற்கு முறையான பூஜை மற்றும் மந்திர ஜபம் ஆகியவை மிக அவசியம். அதன் மூலம் ஒருவரது வாழ்வின் துன்பங்களை அகற்றி இலட்சியத்தை அடையக்கூடிய மன உறுதியையும், வாய்ப்புகளையும் அந்த யந்திரம் அளிக்கிறது.